BABAD CIBANGKONG
Miturut cerita wong jaman mbiyen, ana wong lanang enom sing wis ngerti
agama asale sekang Negeri Pasundan. Dheweke seneng maring gadis sing jebule
anak wong garong utawa maling. Ning wis pada seneng lan cinta dheweke terus
nikah lan dadi pasangan utawa suami istri. Sawise mbojo, dheweke manggon neng
umahe wong tuwane sing wadon utawa neng umahe mertuane, sing saben dinan pegaweane
dadi maling. Mertuane dikenal dadi garong sing paling licik lan sekti
mandraguna. Nanging, sawijining dina dheweke diusir dening mertuane supaya
lunga sekang umahe. Sebab pasangan suami istri kuwe ora gelem mangan panganan
sekang mertuane sing hasil maling utawa garong.
Dheweke
lunga sekang Negeri Pasundan, mlaku langka tujuan. Wong lanang enom kuwe karo
bojone nggembara, nglewati, lan nlusuri alas roban. Akhire wong lanang kuwe dikenal karo sebutan Mbah Surawana,
asale sekang tembung nglangsur ing wana sing
tegese nggembara, nglewati, lan nlusuri alas roban. Udan panas dilewati nang
perjalanan. Sebab wis ngrasa kesel, akhire dheweke mutusna, utawa ngundur
kanggo liren neng ngisor wit sing teduh lan rindang. Nah wit kuwe sing akhire
diarani wit duren, asale duren kuwe sekang tembung ngundur lan liren. Neng sekitar panggonan kuwe uga dheweke mutusna
manggon lan mbabad alas kanggo mbangun panggonan kanggo dheweke urip.
Sawise
sue diusir lan ninggalna keluargane neng Pasundan, jebule Surawana lan bojone
digoleti dening keluarga lan sedulur-sedulure sing neng Pasundan. Kabeh
keluarga lan sedulur akhire nggoleti Surawana lan bojone meng arah wetan.
Dheweke butul meng daerah Surawana karo bojone manggon. Pas lagi neng
perjalanan, keluarga lan sedulure Surawana nglewati kali. Salah siji wong
sekang keluargane ana sing weruh kewan akeh neng jero kali lan salah sijine
kuwe gede banget nanging wong kuwe ora ngerti kewan apa sing neng kono, akhire
wong kuwe takon “Eta naon di cai ?” sing
tegese “Apa sih kuwe sing neng njero
banyu ?”. Wong liyane sing ngerti njawab ”Eta bangkong” tegese “kuwe
bangkong”. Nah sekang tembung cai =
ci lan bangkong kuwe, akhire
panggonan Surawana lan bojone manggon diarani CIBANGKONG.
Ora
let sue, akhire keluarga karo sedulure Surawana lan bojone ketemu Surawana lan
bojone neng panggonan kuwe. Jebule bojone Surawana urung sue lairan, bayi sing
kepisane. Sedulure Surawana nggawakna uthuk utawa anak ayam dadi oleh-oleh
kanggo bayine. Terus ayam kuwe dikurung neng njero gondek (keranjang ayam).
Konon, sekang kurungan ayam kuwe, anak kepisane Surawana diarani Gandek. Kawit
siki esih dipercaya kuburane Mbah Gandek panggonane esih ana neng daerah Pekuburan
Munthuk (salah siji kuburan sing ana neng Cibangkong sebelah wetan sing esih
ana, daerahe jenenge Gaplor). Surawana duwe anak papat. Anak kelorone dijenengi
Padar. Dibanding Gandek, konon Padar lewih nakal lan bandel. Nek anak ketelune
dijenengi Melir, sebab dheweke duwe kebiasaan tangi turu awan (wis awan nembe
nglilir). Lan loro anak Surawana sing liyane dijenengi Kerticelili lan Pratin. Pratin
yaiku salah siji anak sing seneng nglakukna tingkah laku prihatin lan tirakat,
nanging kewalikane Kerticelili dikenal dadi garong sing sekti mandraguna. Ilmu
sektine kuwe dheweke nyinauni sekang kakine sing uga dadi garong sekti.
Dicritakna pernah sawijining dina, Kerticelili maling siji kebo duweke wong
Ciberung. Kebo kuwe duwe tanduk sing madep nduwur, kaya tanduk kebo umume.
Nanging berkat kesektiane Kerticelili, aneh bin ajaib tanduk kebo kuwe dadi
kewalik madep ngisor kaya tanduk wedhus gibas. Dadi angger kebo kuwe dipriksa
dening sing duwe, sing duwe ora balakan bisa ngenali kebo jukutane Kerticelili
kuwe.
Kawit
sekiye, kuburan Mbah Pratin lan Mbah Padar esih ana. Keloro kuburan kuwe
jejeran. Nanging kuburan Mbah Kerticelili ana neng pinggir gili, tepate pojok
kulon ngidul pemakaman Cibangkong sebelah wetan yaiku arah dukuh Gandusari.
Kuburan Mbah Pratin kuwe kawit sekiye esih sering ditekani masyarakat kanggo
ziarah neng wulan Syawal. Sekang kuwelah, pekuburan utawa pemakaman neng Cibangkong
esih dianggep ampuh, nganti-nganti kabehan macem wit sing woeh neng kono misale
kelapa, pisang, pucung, lan liyane ora pernah dijukut dening warga sekitar apa
maning dinggo dipangan lan didol.
Kanggo
pengemut-emut jeneng Cibangkong, neng pertelon Cibangkong dipajang patung
bangkong sing madan gede.
# Sumber : sekang internet lan cerita wong sing
terpercaya
0 komentar:
Posting Komentar